Монгол Улсаас БНХАУ-д суугаа ЭСЯ-ны цахим хуудаст зочилж буй Та бүхэнд энэ өдрийн мэндийг дэвшүүлье.

  Монгол Улсаас БНХАУ-д суугаа ЭСЯ-ны цахим хуудаст зочилж буй Та бүхэнд энэ өдрийн мэндийг дэвшүүлье.

   Монгол, Хятад хоёр улс уул усаар холбогдон хаяа нийлэн оршдог өнө мөнхийн найрсаг хөршүүд билээ. БНХАУ-тай найрсаг харилцаа, харилцан  ашигтай хамтын ажиллагааг урт хугацаанд тогтвортой хөгжүүлэх нь Монгол Улсын гадаад бодлогын тэргүүлэх чиглэл байдаг бөгөөд талууд бие  биеийн тусгаар тогтнол, бүрэн эрх, газар нутгийн бүрэн бүтэн байдлыг харилцан хүлээн зөвшөөрч, тус тусын сонгосон хөгжлийн замыг харилцан хүндэтгэж, Иж бүрэн стратегийн түншлэлийн хүрээнд харилцан ашигтай, хамтын ажиллагааг бүхий л салбарт тууштай хөгжүүлж байна.
Сүүлийн жилүүдэд талуудын хамтын хүчин чармайлтын үр дүнд хоёр орны бүхий л салбарын харилцан солилцоо идэвхтэй өрнөж, өндөр, дээд түвшний харилцан айлчлал, уулзалт яриа тогтмолжиж, улс төрийн итгэлцэл, ард түмний харилцан ойлголцол улам бэхжиж байгаад баяртай байна.

Хоёр зууныг дамнасан манай хоёр орны харилцаа эдүгээ 70 гаруй жилийн хугацаанд он цагийн сорилт, шалгуурыг даван туулж, хамтын ажиллагаа шинэ боломж, шинэ агуулгаар тасралтгүй баяжиж, хөгжлийн шинэ эрин үед шилжиж, түүхийн шинэ хуудсыг эхлүүлээд байна.

Миний бие болон ЭСЯ-ны хамт олон цаашид Монгол Улс, БНХАУ хоорондын болон хавсран суугаа орнуудтай хоёр талын улс төр, цэрэг батлан хамгаалах, аюулгүй байдлын салбарын харилцааг бэхжүүлж, худалдаа, эдийн засгийн хамтын ажиллагааг нэмэгдүүлэх, соёл, боловсрол, шинжлэх ухаан, эрүүл мэнд, хүмүүнлэгийн харилцан солилцоог шинэ агуулгаар баяжуулан хөгжүүлэхэд тодорхой зорилтуудыг дэвшүүлж, хүчин чармайлт гарган ажиллах болно.

Монгол Улсын эдийн засгийн тэргүүлэх салбарын бүтээн байгуулалт, инновацийн болон өндөр өгөөжтэй хөгжлийн төслүүдийг хэрэгжүүлэх, гадаад худалдаа, хөрөнгө оруулалт, экспортын төрлийг нэмэгдүүлэх бизнес, аялал, жуулчлалыг хөгжүүлэх, Монгол Улсын гадаадад сурталчлах, суугаа оронд сурч, ажиллаж, амьдарч буй Монгол иргэдийнхээ хууль ёсны эрх ашгийг хамгаалах, тэдгээрийн үүсгэн байгуулсан холбоодын үйл ажиллагаа, санал, санаачлагыг бодит үйл хэрэг болгоход дэмжлэг үзүүлэхэд онцгой анхаарал хандуулж ажиллана.

Энэхүү цахим хуудас нь Та бүхэнд үнэн, бодит мэдээ, мэдээллийг шуурхай хүргэх чухал талбар байхын зэрэгцээ Монгол Улс, БНХАУ харилцаа, хамтын ажиллагааг хөгжүүлэхэд Таны үнэтэй санал, зөвлөмжийг хүлээн авах байнгын “нээлттэй цонх” байх болно.

Монгол Улс, БНХАУ хөгжин цэцэглэж, хоёр улсын ард иргэд эрүүл энх, аз жаргал дүүрэн, дэвжин дээшлэхийн ерөөлийг дэвшүүлье.

ОНЦ БӨГӨӨД БҮРЭН ЭРХТ ЭЛЧИН САЙД Т.БАДРАЛ