ХАМТЫН АЖИЛЛАГААНЫ САНАМЖ БИЧИГ БАЙГУУЛАВ
Монгол Улсаас БНХАУ-д суугаа Элчин сайдын яам болон Ази, Номхон далайн орнуудын ойн нөхөн сэргээлт, тогтвортой менежментийн сүлжээ байгууллага хоорондын хамтын ажиллагааны тухай харилцан ойлголцлын санамж бичгийг 2025 оны 8 дугаар сарын 29-ний өдөр байгуулав.
Санамж бичигт Монгол Улсаас БНХАУ-д суугаа Онц бөгөөд Бүрэн эрхт Элчин сайд Н.Энхболд болон Ази Номхон далайн орнуудын ойн нөхөн сэргээлт болон тогтвортой менежментийн сүлжээ байгууллагын гүйцэтгэх захирал Др. Лү Дө нар гарын үсэг зурлаа.
Энэхүү санамж бичгийн хүрээнд талууд хоёр талын хамтын ажиллагааг өргөжүүлэн хөгжүүлэх, Монголын талтай хамтран өмнө нь төлөвлөсөн төслүүдийн бодит хэрэгжилтийг эрчимжүүлэх, мөн Монгол Улсын Ерөнхийлөгч Ухнаагийн Хүрэлсүхийн санаачилсан “Тэрбум мод” үндэсний хөдөлгөөн, түүнчлэн Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг (COP17) 2026 онд Монгол Улсад зохион байгуулах үйл ажиллагаанд дэмжлэг үзүүлэхээр тохиролцов.
Ази, Номхон далайн орнуудын ойн нөхөн сэргээлт, тогтвортой менежментийн сүлжээ нь бүс нутгийн ойн тогтвортой ашиглалт, сэргээн босголтыг дэмжих чиглэлээр үйл ажиллагаа явуулдаг олон улсын байгууллага бөгөөд Монгол Улс 2010 оноос гишүүнээр нэгдэн, идэвхтэй хамтран ажиллаж байна.
