МОНГОЛ УЛСЫН ТЭРГҮҮН ШАДАР САЙД БӨГӨӨД ЭДИЙН ЗАСАГ ХӨГЖЛИЙН САЙД Н.УЧРАЛ БҮХ ХЯТАДЫН АРДЫН ТӨЛӨӨЛӨГЧДИЙН ИХ ХУРЛЫН БАЙНГЫН ХОРООНЫ ДЭД ДАРГА ЦАЙ ДАФЭН-ТЭЙ УУЛЗАВ

Монгол Улсын Тэргүүн Шадар сайд бөгөөд Эдийн засаг хөгжлийн сайд Н.Учрал 2025 оны 8 дугаар сарын 24-ний өдөр Бүх Хятадын Ардын Төлөөлөгчдийн Их Хурлын Байнгын Хороо /БХАТИХ/-ны Дэд дарга Цай Дафэн-тэй уулзав.

Уулзалтаар хоёр талын харилцаа, хамтын ажиллагаа гүнзгийрэн хөгжиж буйг тэмдэглээд, эдийн засгийн хамтын ажиллагааг цаашид өргөжүүлэх талаар санал солилцов.

Тэргүүн шадар сайд Н.Учрал Засгийн газрын экспортыг нэмэгдүүлэх Ажлын хэсгийн ахлагчийн хувьд худалдааг эрчимжүүлэх хууль эрх зүйн таатай орчин бүрдүүлэх бодлогын шинэчлэл эхлүүлж байгааг онцлоод хамтран ажиллах тодорхой чиглэлүүдийг дэвшүүлэв. Тухайлбал, хилийн боомтын хүчин чадлыг нэмэгдүүлэх, экспортод чиглэсэн сэргээгдэх эрчим хүч үйлдвэрлэх, Монголын экспортын бараа бүтээгдэхүүнийг Хятадын нутгаар дамжин өнгөрөх үеийн эрүүл ахуй, хорио цээрийн зөвшөөрлийг шуурхай олгох зэрэг болно.

БХАТИХ-ын Байнгын хорооны Дэд дарга Цай Дафэн Хятадын “15 дугаар таван жилийн төлөвлөгөө”-г Монгол улсын урт хугацааны хөгжлийн баримт бичигтэй уялдуулж, хоёр талын хамтын ажиллагааг өргөжүүлэх талаар онцлоод, хоёр орны стратегийн хамтын ажиллагааг эрчимжүүлэх, Монголоос экспортлох нүүрсний нийлүүлэлтийг нэмэгдүүлэх, хөрөнгө оруулалтын орчны тогтвортой байдлыг хангахад анхаарал хандуулахыг хүсэв.

Мөн орон нутгийн хамтын ажиллагааны хүрээнд ӨМӨЗО нь Монгол, Хятадын харилцаанд гүүр болж буйн хувьд хил дамнасан төмөр замын бүтээн байгуулалтад түүчээлж ажиллахыг хүсэж байгаагаа илэрхийлэв.