“МОНГОЛ-ХЯТАДЫН 5 ДАХЬ УДААГИЙН ЭКСПО” БНХАУ-ЫН ӨМӨЗО-Ы ХӨХХОТОД ЗОХИОН БАЙГУУЛАГДАЖ БАЙНА

“Монгол-Хятадын 5 дахь удаагийн ЭКСПО”-гийн нээлтийн арга хэмжээ 2025 оны 8 дугаар сарын 25-ны өдөр БНХАУ-ын ӨМӨЗО-ы Хөххотод болж, Монгол Улсын Засгийн газрыг төлөөлөн Тэргүүн шадар сайд бөгөөд Эдийн засаг, хөгжлийн сайд Н.Учрал оролцлоо. Тэрээр хэлсэн үгэндээ, “Монгол–Хятадын ЭКСПО” жилээс жилд цар хүрээгээ тэлж, зөвхөн хоёр улсын төдийгүй бүс нутгийн бизнес эрхлэгч, хөрөнгө оруулагчдыг холбосон олон улсын түвшний арга хэмжээ болон өргөжиж буйг онцлов.

Мөн тэрээр, БНХАУ олон жилийн турш Монгол Улсын худалдаа, хөрөнгө оруулалтын голлох түнш байсаар ирсэн бөгөөд хоёр талын худалдаа нэмэгдэж байна. Цаашид Монгол Улсын Засгийн газраас онцгой анхаарч, худалдааны хэмжээг нэмэгдүүлэхийн сацуу бараа бүтээгдэхүүнийхээ нэр төрөл, бүтцийг нэмэгдүүлэх, сайжруулах, нэмүү өртөг шингэсэн эцсийн бүтээгдэхүүн болон уул уурхайн бус бүтээгдэхүүний экспортыг дэмжих бодлого хэрэгжүүлж байгааг онцлон тэмдэглэв.

Хятадын талаас Бүх Хятадын Ардын Төлөөлөгчдийн Их Хурлын Байнгын Хорооны Дэд дарга Цай Дафэн нээлтийн үг хэлэв.

Энэ удаагийн ЭКСПО-гийн хүрээнд хоёр талын худалдаа, эдийн засгийн хамтын ажиллагааг өргөжүүлэх, шинэ төсөл хөтөлбөрүүдийг танилцуулах, эдийн засгийн хамтын ажиллагааны боломжуудыг цаашид нэмэгдүүлэх чиглэлээр ажил хэрэгч уулзалтуудыг зохион байгуулна. Мөн энэ өдрүүдэд хоёр талын аж ахуйн нэгжүүд бараа бүтээгдэхүүний дээжээ дэлгэн үзүүлэхийн зэрэгцээ урлаг, соёлоо таниулах арга хэмжээг зохион байгуулах ажээ.

Энэ удаагийн ЭКСПО-д манай улсын 350 гаран аж ахуйн нэгж оролцож байна. Арга хэмжээ 2025 оны 8 дугаар сарын 25-31-ний өдрүүдэд үргэлжилнэ.